رد تامر حسني على اتهامات حلا شيحة بعد أزمة كليب فيلم “مش أنا”

رد الفنان تامر حسني على الاتهامات التي وجهتها الفنانة حلا شيحة ضده اليوم عبر حسابها الرسمي على موقع التواص الاجتماعي “انستجرام”.

حيث نشر تامر منشورًا على جميع حساباته على مواقع التواصل الاجتماعي قائلًا: “نهاركم جميل يا أغلى الناس، الحقيقة عمري ما بتخيل إني أدخل في نقاش بالشكل ده مع زميل بحترمه وكان في بينا كل خير، وللتوضيح بما إنك يا حلا كتبتي بوست وأشركتي الجمهور الكريم معانا بدل ما كنتي تكلميني شخصيًا و نتناقش بيني وبينك، فأنا مضطر أرد هنا برضو”.

واستكمل حسني كلامه “أولًا أنا عمري ما وعدتك إن الكليب مش هينزل ده محصلش أصلًا يا حلا مش أنا خالص اللي أوعد و أخلف، الحقيقة إني احترمت كلامي معاكي و وعدتك أشيل مشاهد تانيه طلبتيها وشيلتها بالفعل وشكرتيني عليها و لو حابه تفتكري المشاهد اللي اتشالت بعد أذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة، وبعدين الفيلم بقاله 3 اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس إنما الكليب يتشاف جوه السينمات عادي، منطق غريب فعلًا يا حلا، وبعدين هو مش أنتي اللي مضيتي عقد و تقاضيتي عليه مبلغ كبير عشان الدور ده بعينه، هو مش أنتي اللي صورتيه ومثلتيه بنفسك وبمنتهى الرضا ولا حد أجبرك”.

وأضاف: “وتوضيح للجمهور الكريم أنا و المخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظة تقوليها، ماكنتيش بتردي علينا و تليفوناتك كلها كانت بتقفل في وشنا، أنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما أنتي فجأه اختفيتي ومكملتيش تركيب صوتك في الفيلم ولا جيتي تتصوري عشان أفيش الفيلم أصلًا و مخليتيناش نعرف نعمل أفيش مجمع وبقيتي تقفلي تليفوناتك و تكنسلي علينا كلنا وبعدين أي فيلم بيبقى ليه خطه مسبقه في الدعاية وأنتي عارفاها كويس ووافقتي عليها و ده كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب و يطلعني بغني وبقول الكلام الرومانسي دا للأستاذ ماجد الكدواني مثلًا هو ده يُعقل”

واختتم كلامه “أنا زعلان منك جدًا يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا احترامًا لحجات كتير يمكن فايتاكي بس مش هتفوتني وعلى فكرة أنا واثق أنك عارفة إني مستاهلش منك كده وهكتفي بالتوضيح دا وربنا يهدي الجميع ويكتبلك كل الخير اللهم آمين”.

وكانت حلال شيحة قد أثارت الجدل بعد منشور نشرته مساء أمس عن رفضتها التام الظهور في كيلب فيلم “مش أنا” بعد نزوله على اليوتيوب.

اضف تعليق