الفنان الصاعد محمد حماد يكشف في حواره لـ “حصريات” كواليس مشاركته في “الاختيار 2”
محمد حماد فنان شاب بدأ مسيرته الفنية عام 2010 من خلال الالتحاق بورش إعداد الممثل، وكانت أول شخصية يلعبها هي حسن خليل من خلال مسلسل حارة اليهود عام 2015، وتوالت بعدها عدة أعمال منها لآخر نفس وممنوع الاقتراب والتصوير لتنتهي بمسلسل الاختيار 2.
استطاع حماد أن يبرز موهبته في تجسيد دور الشهيد شادي مجدي من خلال مسلسل الاختيار 2، حيث أظهر شجاعة البطل الشهيد شادي مجدي، من خلال إتقانه للدور وتعارفه على أحد أصدقاء الشهيد ومعرفة طبيعة شخصيته وصفاته والتي كان من أبرزها حس الفكاهة وحبه لأصدقائه ودفاعه عن وطنه وحماية أصدقائه الظباط وظهر ذلك واضحًا في مشهد استشهاده برابعة.
ومن هنا كان لنا هذا الحوار مع الفنان الصاعد محمد حماد وإليكم نص الحوار
حدثنا عن بدايتك في مجال التمثيل؟
بدايتي في مجال التمثيل في 2010 من خلال ورش إعداد الممثل وأول عمل ليا كان في 2015 مسلسل حارة اليهود شخصية حسن خليل.
من هو مثلك الأعلى من الفنانين؟
أنا ضد كلمة مثل أعلى علشان كل شخص في الدنيا عنده مميزات وعيوب، لكن طبعًا جزء كبير من مذكرتي للوسط الفني ومتابعة اللي بيحصل بيبقي من خلال متابعة النجوم الكبار اللي في الساحة وبحاول أركز على مميزات كل واحد فيهم وأحاول أطبقها على المعطيات اللي ربنا صرفهالي علشان أقدر أنجح واستمر في النجاح.
ما هو أكثر دور جسدته وأثر فيك؟
أكتر دور عملته أثر فيا شخصية شادي مجدي في الاختيار 2.
ما هو أكثر دور جسدته قريب من شخصيتك الحقيقة؟
لسه لحد دلوقتي مصدفتش شخصية قريبة من شخصيتي بس نقدر نقول شخصية شادي فيها تفصيلة مشتركة وهي حب الوطن.
مين الممثل اللي نفسك تمثل معاه؟
كان نفسي أشتغل مع أستاذ محمود عبد العزيز اللّه يرحمه.
حدثنا عن تجهيزاتك لتجسيد دور الشهيد شادي مجدي في الاختيار 2؟
تجهزاتي لشخصية شادي مجدي، في البداية كان المرجع الوحيد بالنسبالي إني أبحث عن أي حوار صحفي اتعمل مع حد من أسرته بعد استشهاده عشان أقدر أجمع معلومات عنه بس للأسف مكنش في معلومات كافية لحد ما قدرت أوصل لأحد أصدقائه المقربين، كلمني عن تفاصيل أكتر عن شخصيته من أول روح الفكاهة في التعامل مع زملائه في القطاع لحد سعيه المستمر للاستشهاد وأكبر دليل على صحة معلومة “سعيه للاستشهاد” إن شادي اتصاب مرتين قبل استشهاده مرة بعيار ناري في رجله ومرة ثانية بطعنة في رقبته من قِبل أحد المتظاهرين خلال فض أعمال شغب، ورغم كدة عمره ما رجع أو اتشتت عن خدمة وطنه لحد ما نال الشهادة اللي كان ديمًا بيسعلها.
ومن وجهة نظري إن الإيمان بالعقيدة وحب الوطن للدرجة اللي وصل بيها الشهيد شادي وشهداء آخرين وظباط موجودين في وسطنا من الجيش أو الشرطة الفضل فيها يرجع لأسرهم اللي كبروهم على الإيمان بالله وعلى حب الوطن.
إيه هو تقيمك في عرض المسلسلات في 15 حلقة فقط بما إنك شاركت في مسلسل بين السما والأرض؟
عرض مسلسلات من 15 حلقة شئ ممتاز جدًا وله فوائد كثيرة أهمهم بالنسبالي إن أحيانًا كتير القصة متبقاش محتاجة تتحكي في 30 حلقة بس المؤلف بيبقي ملتزم بعدد الحلقات فيزود في الحلقات لمجرد إنه لازم يلتزم بفكرة الـ 30 حلقة.
وفي نفس الوقت الـ 15 حلقة هتوفر أفكار أكتر وبالتالي فرص عمل أكتر لجميع القائمين على أي عمل درامي وبالتالي هيبقى عرضنا أفكار أكتر وامتعنا المتفرج ووفرنا فرص عمل أكتر للقائمين على الصناعة وده هيساعد على اكتشاف مواهب جديدة في جميع المجالات “تمثيل، إخراج، تصوير.. إلخ”.
ما هو تقيمك لمسلسلات رمضان السنة دي، ومتابع مسلسلات إيه؟
بصراحة لسه مكونتش رأي في دراما رمضان السنة دي ولسه متبعتش حاجة عشان ديمًا بحب اجتهد في العبادة أكتر خلال شهر رمضان واتابع بعد الشهر الكريم ولكن من خلال السوشيال ميديا شايف ناس كتير بتتكلم بشكل إيجابي عن الأعمال السنة دي وده يثبت إن في تطور ملحوظ في الصناعة.
ما هي هوايتك المفصلة؟
هويتي المفضلة ركوب الخيل
هل بتحضر لحاجة جديدة؟
في كلام عن مسلسل أوف سيزون بس لسه ممضتش.