محمد سعيد في حواره لـ “حصريات” يكشف كواليس بدايته الفنية

محمد سعيد مغني شاب من مواليد 1995، وُلد في محافظة طنطا، لديه مهارت التلحين وهندسة الصوت والتوزيع الموسيقي.

حقق نجاحات عديدة في الفترة الأخيرة وحصدت معظم أغانيه على نسب مشاهدة تخطت حاجز المليون مشاهدة على منصة “يوتيوب”.

أصبح سعيد حديث رواد مواقع التواصل الاجتماعي بعد طرحه لأغنية “لو” والتي وصلت نسب مشاهدتها 18 مليون.

وتعد من أشهر أعماله تراك “لو، وحدي لكن، ياويلي، بيني وبينك، راجعة تاني، ناسي”.

أجرى “حصريات” حوارًا مطولًا مع محمد سعيد كشف من خلاله عن بدايته الفنية وإليكم نص الحوار.

• إيه أول تراك ليك؟

بدأت الغنى أول مرة في تراك “بكتبلك” وبعد كدة “صريح” وبعد كدة “جواكي”، وجواكي هو اللي هتفضل الناس فكراه لإنه نزل أول حاجة على اليوتيوب.

• هل المزيكا كانت حاجة شغلاك في طفولتك ولا حاجة اكتشفتها لما كبرت؟

لأ كانت شغلاني في طفولتي جدًا، من وأنا عندي 15سنة وأنا مهووس بالمزيكا وفكرة أني أعمل مزيكا.

• إيه المشاكل اللي قابلتك في بدايتك؟

مش عارف أصنفهم وأقولهم كلهم لإنهم كانوا كتير بس مفيش حاجه الحمدلله علقت معايا إنها تفضل موجودة بس أكبر المشاكل لما بيجيلي “Art block” فمبعرفش ولا أكتب ولا ألحن ولا أغني.

• شايف إيه التراك اللي برز اسم محمد سعيد وخلت الناس بقت تستناك؟

في كذا تراك، لما نزلت مفيش بديل الناس كانت بتردد “مايستاهلوش قالوا هنفضل مهما يحصل ومفضلوش”، وأكتر حاجة “لو” الناس شايفة إنها هي اللي برزت اسم محمد سعيد.

• نزلت بوست قبل كدة إنك ممكن تبطل مزيكا علشان مش لاقي الدعم اللي تستاهله، هل ده ممكن يحصل دلوقتي بعد النجاح اللي حققته؟

مش عارف ده ممكن يحصل ولا لأ بس أتمنى أنه ميحصلش.

• أبدعت إنك تقدم أغاني حزينة وموجهة للحبيبة فهل ده كان بسبب مواقف مريت بيها ولا علشان النوع ده بيأثر في الناس؟

لا مش بفكر في النوع ده بيأثر في الناس أو لأ بصراحة، هي تجارب مريت بيها ومواقف حصلتلي فحبيت أطلعها للناس لإني مش متكلم جيد، بتكلم بالمزيكا.

• هل إحساسك بالتراك بيختلف لما تسمعه أول ما تعمله ولما بتسمعه بعد ما يحقق نجاح ونسب مشاهدة عالية؟

لأ من أول لحظة التراك بيتعمل فيها بيبان ده هيكون قريب لقلبي ولا لأ، وبيفضل بعدها مكمل معايا.

• هل هتتعاون مع مغني وتعملوا حاجة مع بعض؟

هو دلوقتي مفيش في خطتي حاجة، بس ممكن اه أو لأ في اللي جي محدش يعرف.

• حابب تعمل أغنية من أغانيك كليب ولا لأ؟

أكيد، حابب ده جدًا وإنشاء الله هيحصل قريب.

• ممكن تتعاون مع فريق عمل مختلف علشان تعمل أغنية من لون تاني غير اللي بتقدمه؟

اه، ممكن ليه لأ.

• بتحضر لإيه جديد الفترة الجاية؟

مش عاوز أحرق حاجة بس بحضر لأكتر من حاجة للفترة الجاية، وهينزل تراك قريب بعنوان “غيبي” بس لسه مقررتش إمتى.