حصريات موقع شبابي يتناول كل الأخبار والموضوعات التي تخص الشباب في مختلف المجالات

حسني شتا يكشف كواليس بدايته الفنية وأعماله الجديدة (حوار)

حوار – ندى الجوهري
حسني شتا ممثل شاب موهوب اكتشف حبه الشديد للتمثيل بعد الثانوية العامة، بدأ مسيرته الفنية من خلال فريق مسرح الجامعة حيث التحق بكلية الآداب جامعة الإسكندرية.

وكان أول عمل مسرحي له هو ديوان البقر ومن أعماله أيضًا مسرحية “الناس اللي في التالت” و”تحب تشوف مأساه” و”حلم ليلة صيف”، ترك الإسكندرية وجاء للعاصمة من أجل تحقيق حلمه.

عانى في بداية رحلته الفنية من أجل الحصول على فرصة حقيقة لإبراز موهبته، ثم حصل على مشهدين في فيلم بدل فائد وأثبت نجاحه.

وتوالت نجاحات حسني شتا بعدها، شارك في العديد من الأعمال مسلسل “نوسة وبسبوسة، مش فريندز، فرق توقيت، خطوط حمراء، عشم أبليس، قابيل، طلقة حظ، أبو جبل”.

أجرى “حصريات” حوارًا مطولًا مع حسني شتا كشف خلاله عن كواليس بدايته ومجموعة من الأسرار وإليكم نص الحوار.

  • هل التمثيل كان حلمك من وأنت طفل؟

لأ، وأنا صغير لما كنت بتسأل في العيلة كنت بقول مهندس، دكتور، طيار، رائد فضاء، ميكانيكي كنت كل أسبوع بمهنة جديدة.

  • اكتشفت امتى إنك بتحب التمثيل؟

بعد ما خلصت الثانوية العامة لقيت إني مبحبش حاجة معينة، بس بحب أجرب كل حاجة ووجدت إني مش هقدر أحقق ده غير في التمثيل، ودخلت كلية الآداب جامعة الإسكندرية، وأول حاجة دورت عليها كان فريق المسرح، والتحقت بيه، ومثلت في القصور الثقافية منها قصر ثقافية الأنفوشي، المراكز الثقافية الأجنبية ونوادي المسرح.

تركت الإسكندرية وانتقلت للقاهرة لتحقيق حلم التمثيل نظرًا لوجود شركات الإنتاج، المخرجين وكاتب الكاستينج.

  • أول دور ليك كان إيه؟

أول دور كان مشهدين في فيلم “بدل فائد” ونجحوا والناس كانت فكراهم وبعدها عملت ست كوم “مش فريندز”.

شاركت في أعمال كثيرة منها “عشم أبليس، طلقة حظ، قابيل، أيوب، قابيل، الأب الروحي”.

  • ما هي أكثر شخصية قصرت فيك وكان صعب التخلص منها؟

كل الشخصيات بتأثر فيا وبتخلص منها بصعوبة لإني بعيش الشخصية اللي بلعبها ومش بيبقى سهل أخرج منها ومنهم شخصيتي في “أيوب” كانت معلمة معايا، وبرضو شخصيتي في “شديد الخطورة” كانت هوساني.

  • مين الناس اللي ساعدتك ومؤثرة في مشوارك؟

أحمد صالح مخرج “أيوب، بحر، ليالينا 80، أبو جبل” وهو صاحب فضل عليا بعد ربنا، بيخليني طول الوقت مختلف في الشخصيات اللي بلعبها، والمؤلف محمد سيد بشير اشتغلت في أيوب بترشيح منه، محمد دياب، بيتر ميمي، ريمون مقار، دول من الناس اللي عملتلي نقلات في حياتي الفنية.

  • مين الممثل اللي نفسك تشتغل معاه؟

أنا نفسي اشتغل مع كل الموهوبين سواء أصغر مني أو أكبر، أنا بستمتع جدًا بالتمثيل مع الموهوبين وأمنية حياتي كانت إني أمثل مع أحمد ذكي ومحمود عبدالعزيز الله يرحمهم.

  • كلمنا عن شخصية محمود في مسلسل سكن البنات؟

محمود طالب في كلية حقوق سنة رابعة، شخص مجتهد ومتفوق، أنا حابب الشخصية لإن فيها مني هو عصامي وبيعتمد على نفسه، بيشتغل وقت الدراسه، لإن والده والدته متوفين وهو بيراعي أخوه، وبيشتغل في مكتب بيعمل مذكرات للطلبة، عنده طموح إنه يبقى معيد ودكتور في الجامعة، شخص ابن بلد وجدع.

  • إحساسك إيه بعد النجاح اللي وصلتله؟

بقول الحمدلله وحاسس إن ربنا مبيديعش مجهود حد، الحمدلله على كل خطوة بخدها، كنت بعاني علشان أدخل اللوكيشن، دلوقتي اللي واقف أمن على الباب مش فاكر إن اللي بيقوله دلوقتي إزيك يا نجم وإزيك يا أستاذ حسني وأنا داخل بالعربية إن ده اللي كان بيمنعني إني أدخل بس ببقى مبسوط وبعامله كويس لإن ده كان شغله.

  • كلمنا عن الأعمال الجديدة ليك؟

في مسلسل هدخل أصوره يوم الثلاثاء القادم هيكون للمنصات، هيبقى 7 حلقات إخراج كامبا، كتابة أحمد أنور وجاميكا إنتاج إسحاق وعبدالله منصور، نوعه سيسبنس رعب.

  • مع أو ضد فكرة إن مسلسلات بتتعرض دلوقتي على منصات الإلكترونية ؟

شايفها حاجه عظيمة، كنت خايف منها في مسلسل شديد الخطورة ومع ذلك المسلسل نجح بطولة “أحمد العوضي وريم مصطفى” وكانت أول تجربه لـ “watch it”، وأنا مع أي إنتاج بيحصل، هي تجربة مهمة وفي جيل كامل بتستهويه فكرة إنه يتفرج على الحاجة على المنصه في الوقت اللي هو عايزه غير التلفزيون ممكن الأسرة تبقى بتتفرج على حاجة وهو عايز يتفرج على حاجة مختلفة دلوقتي متاح إنه يمسك الموبيل ويتفرج على اللي عايزه.

  • رأيك في فكرة إن عدد حلقات المسلسل تكون قليلة؟

أنا مع فكرة أن المسلسل يبقى 10حلقات و7 و12 حلقة متبقاش ولا 30 ولا 60، أنا مع التكثيف ده، ويبقى في أكتر من سيزون.

  • هل هتشارك في سباق الرمضاني 2021؟

آه هيبقى في “القاهرة كابول” ولسه في حاجات تانية مش عارف هتحصل ولا لأ، وفي مسلسل هيتعرض قريب اسمه “في يوم وليلة” إخراج شرين عادل بطولة “محمد رزق، داليا مصطفى، آيتن عامر” وده هيتعرض في نص شهر 2.

  • تحب تمثل شخصيات تاريخية زي صلاح الدين؟

أمنية حياتي إني أعمل شخصية فرعونية، وشخصيات في التاريخ الإسلامي، إحنا تاريخنا مَلِيء بالشخصيات ثرية وينفع تتجسد، وكمان نفسي أعمل خيال علمي.

  • ازاي بتستغل وقت فراغك؟

بلعب رياضة، بقرأ، بقضي وقت مع الكلاب بتاعتي أو في الصيف بروح دهب دي هوايتي بحب السفر جدًا، والكلاب، وبحب ركوب الخيل.

قد يعجبك ايضا