أسامة الهادي يكشف كواليس “الذكرى الشتوية” ودخوله الوسط الفني (حوار)

حوار – ندى القباني
أسامة الهادي ممثل ومطرب وملحن مصري من مدينة المنصورة حقق شهرة بعد ظهوره في إعلان دعائي لأحد شركات المحمول بعنوان “عشان لازم نكون مع بعض” عام 2012.

أطلق الهادي أول ألبوماته “يومًا ما هطير” عام 2016، ودخل مجال التمثيل من بوابة مسلسل “الأب الروحي” ومن ثم لمس أكتاف وكلبش 3.

خاض الهادي أولى تجاربه التمثيلية في كليب غنائي “كليب الذكرى الشتوية” مع كارمن سليمان، من كلمات باسم عادل وألحان تامر علي وتوزيع يحيى يوسف، وبالإضافة إلى مشاركته المنتظرة في مسلسل “تقاطع طرق” خلال السباق الرمضاني 2021، والذي قد بدأ أبطال العمل تصويره منذ عام.

أجرى “حصريات” حورًا مطولًا مع أسامة الهادي كشف خلاله عن مجموعة من الأسرار والكواليس وإليكم نص الحوار

• شاركت في مسلسلات منها كلبش، لمس أكتاف، الأب الروحي، مين ساعدك تدخل مجال التمثيل؟ وإيه أحب الأدوار ليك؟

أستاذ هاني سرحان دفعني لدخول مجال التمثيل حيث كان يرى في ممثل بشكل أو بآخر، وأنا تحمست لأني كنت أريد التطوير من نفسي في الكليبات وأن أصبح أكثر تفاعلًا أمام الكاميرا بحيث أستطيع تقديم تجربة غنائية بجانب التجربة الموسيقية.

بالنسبة لأحب الأدوار ليا بحب دور “شامبا” في تقاطع طرق اللي بصوره حاليًا، وبحب شخصية”يس” في الأب الروحي دور “يس” له معزة خاصة عندي لإنه أول دور ليا، الاسم بالشخصية وكل أحاسيسها بحبهم جدًا وطبعا كلبش.

• احكيلنا عن شغفك وعلاقتك بالمزيكا؟

بدأت علاقتي بالمزيكا تقريبا عام 2007-2008، الموضوع له علاقة بكوني شاب صغير تايه، مش حابب اللي بيعمله الشباب في سني، أو مش حابب أعمل كده بشكل شخصي، لم يكن يستهويني الجلوس على قهوة أو المشي أو الذهاب للنادي، وقتها كنت بحب الكمبيوتر والتكنولوجيا لكن عيلتي كانت بترفض إني أنزل “سايبر” أو أقضي وقت طويل جالسًا على الكمبيوتر.

أنا أذكر إن كان في ألبوم لعمرودياب، وسمعت لحن عزفه “أوسو” على الجيتار، من هنا قررت إني أتعلم الآلة دي، المزيكا بالنسبة لي بدأت من هنا نتيجة لأني بفضل أحلل حاجات، “أنا في حياتي عمتا كل حاجة بتبدأ كده، أنا بحلل كل حاجة دايمًا”.

عند دخولي مجال التمثيل، أصبحت أشاهد مسلسلات وأفلام وأوقف عند الأجزاء اللي أثرت فيا، وأفضل أحلل الممثل “إزاي أثر فيا كده، يعني هو عمل إيه عشان يوصلي الإحساس ده، سواء في المزيكا أو التمثيل أنا عايز أعمل زي مالناس دي بتعمل فيا، عايز تمثيلي يأثر في الناس زي مالناس دي أثرت فيا ده المبدأ بتاعي”.

وتابع “بدأت أفهم يعني إيه مزيكا، إيه الجيتار ده، لحد ما كل شوية بقيت اتعلق بحاجة، الأول اتعلقت بالجيتار كآلة وبعدين اتعلقت بالتلحين، وإني أخلق أغنية و ألفها وألحنها”.

بالمناسبة أستاذ “هاني سرحان” بيكتب وهو مؤلف وشاعر شاطر جدًا، فابدأت في تلحين كلماته والموضوع تطور وبقيت أغنيها أنا؛ لأني لما كنت بديها لحد مكانتش بتطلع بالإحساس اللي أنا عاوزه، على الرغم إن صوتي مش أحلى حاجة.

لسه عندي كتير، اللي بحاول أعمله دلوقتي إني أرجع واحدة واحدة، أنا محترم الخطوات اللي أخدتها واللي الجمهور احترمها، بدور على حاجة تليق بالناس اللي استنتني فترة، وتكون حاجة تليق باللي نفسه أقدمه، واللي يكون موجود في العالم تحت اسمي، وتكون حاجة تليق بالناس اللي بتحب الشخص اللي اسمه أسامة الهادي.

• تفاصيل مشاركتك في كليب “الذكرى الشتوية” مع كارمن سليمان وإيه شعورك بالتجربة دي؟

بخصوص كليب كارمن فاهي تجربة لذيذة جدًا، كارمن ومصطفى أصدقاء أعزاء من الناس اللي أنا بحبهم وقريبين من بعض على المستوى الشخصي، ومصطفى دي أول تجاربه الإخراجية، كلمني وقالي انت معانا في الكليب، وأنا قولتله من قبل ما يكمل “طبعًا يا معلم أنا معاك”، في كميا بيننا خطيرة، الكليب نازل قريب وأنا اعتقد إن الناس هتتبسط.

الفكرة في إن الموضوع بالنسبة للناس إنه كليب غنائي، متابعين كارمن عارفين إني مغني وأنا طالع أمثل فالموضوع فيه حبكة عجباني وده من الحاجات اللي خلتني أوافق على طول.

• هل بتحضر لأغاني قريب أو إنك تنزل ألبوم زي “يوما ما هطير”؟

بخصوص الأغاني زى ماقولتلك أنا محضر أغاني كتير منهم جاهزين على النزول، ومنهم لسه في دور التجهيز.

في أغنية بتمنى إنها تنزل في غضون الفترة الجاية دي قبل رمضان إن شاء الله وتكون العودة، اللي موقف الموضوع شوية إني عايز كل حاجة تحصل زى ما أنا عايزها بالظبط، فأنا واخد وقتي عشان مش عايز بعد كل التعب والغيبة دي أنزل حاجة عادية، أنا عايز أنزل حاجة قوية بس مستني الوقت المناسب.

في فكرة مطروحة وهي إني أنزل تجميعة أغاني مش عايز أقول ألبوم غنائي، يعني أنا عايز أفضل على مدار سنة كاملة بنزل في أغاني كلها مترابطة مع بعض، أنا حابب أقدم اللي أنا عاوز أقوله، فضلت أكتر من سنة في نقاش مع نفسي إن الذوق اتغير أي كان بقى وحش أو حلو فهو اتغير، واللي احنا بتقدمه مبقاش متصدر الساحة، بس لاقيت إن كل اللي أنا عايزه إني اتبسط بالمزيكا اللي بقدمها.

في احتمالية إني أعمل مشروع خلال السنة للأغاني اللي أنا بحبها وبتعبر عني، وتنزل على شكل تجربة معينة بدون الرجوع إن الأغاني هتجيب مشاهدات قد إيه أو تكون تريند ولا لأ، مبقتش أهتم بالحاجات دي، أيوة طبعًا نفسي الناس تسمع الحاجات اللي بعملها، لكن أنا قررت أعمل اللي بحبه ومش هدخل الـ “business” في الموضوع أو ألوي دراع المزيكا عشان تتسمع وتبقى تريند بس ده كله في إطار التفكير لحد ما المسلسل ينزل والأغنية الجديدة تنزل ونشوف ردود الأفعال.